✺Baburname

Panjshanba kuni andin ko‘chub men Tus suyining qotilishig‘acha kema bila keldim.

Qotilishidin kemadin chiqib otlanib Tus suyi yo‘qqori yurub namoz-i digar o‘rdug‘a kim sudin o‘tub tushub edilar keli[l]di.

Bu kun olti kuro‘h kelildi.

Tonglasi ul yurtta maqom bo‘ldi.

Shanba ko‘chub o‘n iki kuro‘h yurub kentning yo‘qqori norig‘a tushtuk.

Ushbu yurtta Chunordin Toj Xon o‘g‘lonlari bila kelib mulozamat qildi.

Bu ayyomda Muhammad Baxshining arzadoshti keldi kim Kobuldin ko‘ch va uruq tahqiq keladur emish.

Chahorshanba kuni ul yurttin ko‘chub Chunor qo‘rg‘onini sayr qilib Chunordin bir kuro‘hcha o‘tub tushuldi.

Payogdin ko‘chkan ayyomda vujudimda obila jarohati paydo bo‘lub edi.

Bu yurt ta bir Rumi Rumda emdi paydo bo‘lg‘on muolajani qildi.

Murchni safol qozonda qoynatti.

Jarohatni aning isig‘ buxorig‘a tuttum.

Buxori kamroq bo‘la isig‘ suyi bila yudum.

Iki soat-i nujumig‘acha dirang bo‘ldi.

Ushbu yurtta bir kishi aytti kim o‘rduning yonidog‘i arolda sher-u kark ko‘rupturlar.

Sabohi ul arolni chargaladuk.