✺Baburname

O‘zbaklar yetgan bila toshqori kishini bosib tushura tushura olib oq teprarlar.

Orqag‘a evrulub teva va partol o‘lja qilurlar.

Oxir arobaning ichidagilar zanjirni ochib chiqarlar.

Munda ham zarb urush bo‘lur.

O‘zbak uch qatla yondura solur.

Tengri taolo inoyati bo‘lub O‘zbakni bosarlar.

Ko‘chum Xon va Ubayd Xon, Abu Sa’id Sulton boshlig‘ to‘quz sulton giriftor bo‘lur.

Bir Abu Sa’id Sulton tirik emish.

O‘zga sekiz sulton maqtul bo‘lur.

Ubayd Xonning boshini topmaslar, tanasini toparlar.

O‘zbakdin ellik ming kishi va Turkmandin yigirma ming kishi qatlg‘a borur.

Ham ushbu kun G‘iyosiddin Qo‘rchi kim o‘n olti kunluk mo‘ljar bila Javnpo‘rg‘a borib edi, keldi.

Sulton Junaydlar Haridqa cherik borg‘ondurlar.

Bu Haridqa borg‘on jihatidin mo‘ljarg‘a yetisha olmas.

Sulton Junayd og‘iz so‘zi muni deptur kim: “Shukr Tengri inoyatidin bu taraflarda podshoh mutavajjih bo‘lg‘uncha ish ko‘runmaydur.

Mirzo kelsalar, bu navohidog‘i salotin-u xavonin-u umarog‘a farmon bo‘lsa kim Mirzo qadamida mutavajjih bo‘lsalar, umid bor kim bori ishlar osonliq bila Agarchi Sulton Junaydtin mundoq javob keldi, vali Mullo Muhammad Muzahhibni kim Songo kofir ning g‘azvidin so‘ng Bangolag‘a elchilikka yiborilib edi, bu kun tongla kelur dey-durlar erdi, aning xabarig‘a ham boqildi.