✺Baburname

Turshlig‘idin mu ekan, xosiyattin mu ekan?

Turshlig‘i noranj-va limucha bo‘lg‘oy.

Yana Hindustonda tavri gullar bordur.

Bir josundur.

Ba’zi Hindustoni kadhil derdur.

Giyoh emas.

Butasi soqliq.

Gulbun dek qizil gul butasidin bir nima balandroqtur.

Rangi anor gulidin hanuz sirroqtur.

Ulug‘lug‘i qizil gulcha bo‘lg‘oy, vale qizil gul g‘uncha bo‘lg‘ondin so‘ng bir o‘q ochilur.

Bu josun kim ochildi, ortasidin yana ham ushbu bargidin inchka bo‘lub, tona dek bir ilik uzob, yana ushbu josun barglari ochiladur.

Hosil du-shabih [?] gul bo‘ladur.

Xeyli az g‘aroyib emas.

Daraxtining ustida bisyor xushrang va nima ko‘runadur.

Ko‘p turmaydur.

Bir kunda o‘q pajmurda bo‘ladur.

To‘rt oy peshkol oylarida asru xo‘b ochiladur.

G‘olibo aksar yil ochilur, vale bu ko‘pluk bila idi yo‘qtur.

Yana bir kanirdur; oq ham bo‘ladur, qizil ham bo‘ladur.

Shaftolu vaz’liq panj barg bo‘ladur.

Qizil kanirning shaftolu gulig‘a shabohati bor, vale kanir guli o‘n to‘rt o‘n besh gul bir yerda ochiladur.

Yiroqdin bir ulug‘ gul dek ko‘runadur.

Muning butasi gulbundin ulug‘roqtur.

Qizil kanirning tavrig‘ina idi bor, xushoyandadur.

Bu ham peshkolda ko‘p xo‘b ochiladur.

Bu ham aksar yil topilur.