✺Baburname

Oshliq maslahatidin tog‘ domanasi bila Siyol Ko‘t yo‘li bila mutavajjih bo‘lduq.

Hotiy Kakarning viloyatlari to‘g‘ri yetkanda bir rudta har yerda qalin sular turubtur.

Bu sular tamom yax bog‘labtur.

Agarchi xayli qalin emas, bir elikcha qalin-liqi bo‘lg‘oy, Hinduston viloyatida bu nav yax g‘aribtur.

Yaxni ushanda-o‘q ko‘ruldi.

Bir necha yil kim viloyatda eduk, qor va yaxdin osor-u alomat ko‘rulmadi.

Sinddin besh ko‘ch ko‘chub oltinchida Jud tog‘ig‘a payvast Bolnot Jo‘giyning tog‘ining tubida Bakiyollar yurti rudig‘a kelib tushuldi.

Tonglasi el oshliq olur maslahati uchun ul yurtta turduq.

Ul kun araq ichildi.

Mullo Muhammad Parg‘ariy ko‘p hikoyat qildi kim oncha pur-go‘y qulluq qilib edi.

Mullo Shams xud ertaki shaloyin edi.

Bir shaloyinliq boshlasa kechkacha tugata olmay edi.

Oshliqg‘a borg‘on qul va qulluqchi va yaxshi va yamon oshliqdin o‘ta chiqib jangal va tog‘ va qatiq va bo‘rto‘q yerlarga parishon va behisob borib bir necha kishi oldurdilar.

Kichkina Tunqotar anda o‘ldi.

Andin ko‘chub Bihat suyini Jilamdin quyiroq guzar bila kechib tushtuq.

Valiy Qizil kim parganasi Bimro‘giri Akriyoda edi, Siyol Ko‘t ko‘maki edi, munda kelib ko‘rdi.

Siyol Ko‘tni asramag‘on jihatidin itob va hisob maqomida eduk kim arz qildi kim men parganaga kelib edim, Xusrav Ko‘kaldosh Siyol Ko‘ttin chiqarida manga xabar qilmadi.