✺Baburname

Langar Xong‘a xil’at berib Muhammad Ali Jang Jangka ko‘mak ta’yin qilib ruxsat berildi.

Ul axshom Xoja Muhammad Alining chodirida chog‘ir majlisi edi.

Erta bila bu yerdin ko‘chub Xaybar ko‘talidin oshib ko‘tal tupig‘a tushuldi.

Xizr Xayldin ko‘p noshoyist harakatlar zohir bo‘lub edi.

Cherik borurda keyindin qolg‘on, yoqag‘a tushgan cherik eliga o‘qlar qo‘yub otlarini elturlar edi.

Alarg‘a ta’dibe qilmoq va go‘shmole bermak vojib-u lozim ko‘rundi.

Bu xayol bila ko‘tal tupidin sahar ko‘chub Dih-i G‘ulomonda tush-landuk.

Namoz-i peshin otqa bo‘g‘uz berib otlanildi.

Muhammad Husayn Qo‘rchini Kobulg‘a chopturuldi kim Kobul bo‘lg‘on Xizr Xaylini bandlab jihotini mufassal qilib arzg‘a yetkurgaylar.

Badaxshondin dog‘i har xabar bo‘lsa mashruh bitib bir kishidin bat yiborg‘oylar.

Ul kecha ikki posqacha yurub Sultonpurdin ozroqcha o‘tub tushub lahza uyuxlab otlanduk.

Xizr Xayl Bahor va Panj Giromdin sug‘acha olturg‘on ekandurlar.

Tong burnida yetib chopqun qo‘yuldi.

Aksar moli va o‘g‘lon ushog‘i cherik eliga tushti.

Ozroqchasi tog‘qa yovuq edi, tog‘qa tortib qutuldi.

Tonglasi Qila-g‘ug‘a tushuldi.