✺Baburname

Qilotdin o‘tkali cherik eli xayli ochliq tanqisliq tortib edi.

Xalishak navohisig‘a kelgach yuqori quyi qo‘y va uy va oshliq va somon jihatidin cherik elining ko‘pragi bo‘trab tarqob edi.

Cherikini yig‘ilurig‘a boqmay chopa atlanildi.

Bizning ne kim bo‘lg‘on kishimiz ikki mingga yovushqoy edi.

Munda tushar mahalda nechuk kim mazkur bo‘ldi, yuqori quyi cherik elidin xayli kishi borib edi.

Urush vaqti alar qo‘shula olmadilar.

Urushta hozir kishimiz ming chog‘liq bo‘lg‘oy edi.

Agarchi kishimiz oz edi, vale xayli yaxshi tuzuk va mazbut yosol ta’biya-yu tartib qilib edim.

Hech mahal ancha tartib-u nasaq bila yosomaydur edim.

Xossa tobinida kim tamom eligidin ish kelur yigit-larni ayirib edim, tamom o‘n o‘n va ellik ellik bitilib o‘n ulug‘i va ellik ulug‘i ta’yin etib edim.

Har o‘n va har ellik o‘ng qo‘lda va so‘l qo‘lda turar yerlarini bilib urush chog‘i qilur ishlarini ma’lum qilib hozir-u nozir erdilar.

Barang‘or javong‘or va o‘ng qo‘l va so‘l qo‘l, o‘ng yon va so‘l yon, o‘ng va so‘l chopa atlang‘och, be-kulfat-i yosomoq va be-minnat-i tavochi cherik eli yerlig‘ yeri bila o‘q mutavajjih bo‘ldilar.