✺Baburname

Kepek Mirzo ozroq kishisi bila og‘osining g‘animig‘a chopar.

Ani ham ko‘tarurlar.

Ikkala og‘o-inini tushururlar.

Bir yerda olturg‘uzg‘onda og‘o-ini birbirini quchushub, o‘pushub vido’ qilurlar.

Abul Muhsin Mirzodin bedilliq zohir bo‘lur.

Kepek Mirzog‘a chandoniy tafovut qilmas.

Ikkala Mirzoning boshlarini Shayboq Xon Pul Solor ekanda yiborurlar.

Bu ayyomda Shoh Beg va inisi Muhammad Muqim Shayboq Xonning tavahhumi-din muqarrar elchilar va arzdoshtlar yiborib, izhor-i yakjihatliq va davlatxohliqlar qildilar.

Muqim xud bir arzdoshtida sarih meni tilab edi.

O‘zbek viloyatni mundoq bilkulliy olg‘on mahalda bizning boqib turmog‘imiz munosib ko‘runmadi.

Chun muncha elchi va arzdoshtlar yiborib bizni tiladilar, alarning kelib mulozamat qilmoqlarida taraddud kamroq qoldi.

Bori beglar va sohibroy kishilar bila mashvarat qilib, so‘zni munga qo‘yuldi kim cherig otlang‘oy, bu Arg‘un beglari qotilg‘ondin so‘ng Xuroson ustiga yurumakni yo har maslahat bo‘lur, bularning saloh-u savobdidi bila qaror berilgay.

Bu azimat bila Qandahor sori mutavajjih bo‘lduk.

Habiba Sulton Begim kim «yenga» der edim, nechuk kim mazkur bo‘ldi, qizi Ma’suma Sulton Begimni Hirida muqarrar bo‘lg‘on yosunluq olib keldi.