✺Baburname

Bir-ikki ko‘chdin so‘ng Ob-i Istodag‘a yettuk.

G‘arib ulug‘ nazarg‘a keldi.

Ol yuzdagi dashtlar xud aslo ko‘run-maydur.

Su osmon bila payvast ko‘runadur.

Ol yuzdagi tog‘lar va pushtalar tavri kim sarobning ol yuzidagi tog‘ va pushtalar muallaq ko‘runur, bu tog‘lar va pushtalar ham yer bila ko‘kning arosida muallaq ko‘runur.

Munda yig‘ilur sular Katta-voz vodiysining va Zurmat jalgasining, G‘azni rudining, Qarobog‘ o‘lang-ning bahor yomg‘urlarining sayllari va yozlar su ulug‘oyg‘onda ziroattin o‘tkan sulari emish.

Ob-i Istodag‘a bir kuro‘h yetkanda ajab nima mulohaza qilduq.

Har zamon bu su bila osmonning arosida shafaq dek nima qip-qizil ko‘runadur, yana bartaraf bo‘ladur.

Yavuq yetkuncha bu hol edi.

Yavuq yetkanda ma’lum bo‘ldi kim bog‘lon qoz ekandur.

Ne o‘n ming va ne yigirma ming, asru ko‘p bog‘lon qoz!

Qolin bog‘lon qoz uchub qanot urg‘onda qizil parlari goh ko‘runub goh ko‘runmas ekandur.

Ne yolg‘uz bu qush, har qushdin behadd-u hasr bu su yaqosida, qolin qushning yumurtqasi bu su qirog‘ida.

Bu qushlarning yumurtqalarini olg‘oli kelgan ikki afg‘on bizni ko‘rgan bila o‘zini sug‘a soldi.