✺Baburname

Bu kun kim munda turuldi, chopqunchi borib Dashtning kentlaridin qalin uy-u qo‘y kelturdilar.

Afg‘onlarning savdogarlarini yo‘luqturub qalin oq raxt va aqoqir-u qand-u nabot, to‘pchoq otlar-u savdo otlari kelturdilar.

Xoja Xizr Nuhoniy, kim Afg‘onlar orosida mashhur-u mu’tabar savdogarlardin edi, Hindiy Mo‘g‘ul tushurub boshini kesib kelturdi.

Shirim Tag‘oyi chopqunchining keynicha borib edi.

Bir yayoq Afg‘on Shirim Tag‘oyi bila ro‘baro‘ bo‘lub Shirim Tag‘oyining shahodat barmog‘ini tushura chopti.

Tonglasig‘a ko‘chub Dashtning kentlarining orosida yovuqroq tushuldi.

Andin ko‘chub Go‘mal suyining yaqosig‘a tushuldi.

Dashtdin G‘azni tarafi iki yo‘l chiqar ermish: bir Sang Surox yo‘li kim Barkdin o‘tub Farmul kelur; yana bir Go‘mal rudni yoqolab Barkka yetmay, bu ham Farmul kelur.

Go‘mal yo‘lini ba’zi xushladilar.

Dashtta ekanda iki uch kun payopay yomg‘urlar yog‘di.

Go‘mal rudi xayli ulg‘oyib edi.

Andoq kim tashvish bila guzar topib o‘ttuk.

Yo‘l bilur kishilar arz qildilar kim Go‘mal yo‘lida bu rudni necha qatla kechmak kerak, agar su mundoq ulug‘ bo‘lsa mushkildur.

Bu yo‘lida ham taraddud bo‘ldi.

Hanuz so‘zni birga qo‘yulmaydur erdi.

Tonglasi tabl-i ko‘ch choldurub ot ustida-o‘q so‘zlashib qaysi yo‘l bila yururni qaror berur xayolda edim.