✺Baburname

Yana bir sichqon Nijrovda bo‘lur emish, mush-i miskin derlar.

Mushk idi andin kelur emish.

Ani men ko‘rmaydur men.

Yana bir Panjshir tumanidur.

Panjshir yo‘l ustida voqi’ bo‘luptur.

Kofiriston anga bisyor yovuq.

Qutto‘ ut-tariq kufforning mururi Panjshirdindur.

Kufforg‘a yovuq uchun mundin ham kelim olurlar.

Men bu navbat kelib Hindustonni fath qilg‘onda kofirlar kelib Panjshirdin qalin kishi o‘lturub ko‘p xarobliqlar qilib turlar.

Yana bir G‘urbend tumanidur.

Ul viloyatlarda ko‘talni band derlar.

G‘ur sori bu ko‘tal bila borurlar.

G‘olibo ul jihatdin G‘urbend deb turlar.

Sar-daralari Hazoralar shug‘l qilib tur.

Bir necha kenttur, kam hosil--roq yerdur.

Derlar kim G‘urbend kim G‘urbend tog‘larida kumush koni va lojvard koni bo‘lur.

Yana ko‘h-domana kentlaridur.

Boshi Mita Kacha va Parvon va ayog‘i Durnoma, o‘n ikki o‘n uch kent--tur.

Mevalik kentlardur.

Chog‘irlari boridin tundroqdur.

Bu kentlar tamom tog‘ etagida va tog‘ voqi’ bo‘lg‘on uchun, agarchi mollarini ado qilurlar, vale xirojda royij emas--lar.

Bu kentlardin quyi domanada tog‘ bila Boron suyining oralig‘ida ikki porcha hamvor dasht voqi’ bo‘luptur.

Birini Kurra-yi Toziyon derlar, yana birini Dasht-i Shayx.

Yozlar chikin tola oti bisyor yaxshi bo‘lur.