✺Baburname

Ikki uch yerda tangilari bor.

Xiriljiy va jami’ qutto’ut-tariq Afg‘onlar bu yo‘lni urarlar erdi.

Bu oraliqta ma’mura yo‘q edi.

Quruq Soyning ayog‘i Qorotuni men ma’mur qildurdum.

Bu jihatdin yo‘l emin bo‘ldi.

Garmsir bila sardsir orasida fosila Bodom Chashma ko‘talidur.

Bu ko‘talning Kobul tarafida qor yog‘ar.

Quruq Soy, Lamg‘onot tarafida qor yog‘mas.

Bu ko‘taldin ingach kishi o‘zga olami mulohaza qilur: yig‘ochlar o‘zgacha, o‘t-lar o‘zgacha, jonvorlar o‘zgacha, elining roh-u rasmi o‘zgacha.

Niganhor to‘quz rudtur.

Sholisi va bug‘doyi yaxshi bo‘lur.

Noranji va turunji va anori bisyor bo‘lur, yaxshi bo‘lur.

Odina-pur qo‘rg‘onining allida janubi tarafida balandida tarix-i to‘quz yuz on to‘rt-ta bir chorbog‘ soldim, Bog‘-i Vafog‘a mavsum.

Rudqa mushrifdur.

Rud qo‘rg‘on bila bog‘ning orasidadur.

Noranji va turunji va anori bisyordur.

Pahor Xonni bosib Lohur va Dibolpurni fath qilg‘on yili kela kelturub ekturtub edim, sabz bo‘lub edi.

Andin burung‘i yili nayshakar dog‘i ekilib edi.

Yaxshi nayshakar bo‘lur edi va Badaxshon va Buxorog‘a ol nayshakarlardin yiborilib edi.

Yeri murtafi’, oqar suyi muttasil, havosi qishlar mu’tadil.

Bog‘ning orasida bir kichikrak pushta voqi’ bo‘lubtur.