✺Baburname

To‘g‘rirog‘i Bozorakdur.

Tul va Bozorak Sarobqa tushar.

Bozorak ko‘talini Sarob eli Parandiy otliq kentiga inar uchun Parandiy ko‘tali derlar.

Yana bir Parvon yo‘li-dur.

Ulug‘ Ko‘tal bila Parvon arosida yana yeti ko‘tal bor uchun Haft Bacha derlar.

Andarob tarafidin ikki yo‘l kelib Ulug‘ Ko‘talda qotilib, Haft Bacha bila Parvong‘a kelurlar.

Bisyor purmashaqqat yo‘ldur.

Yana uch yo‘l G‘urbandtadur.

Parvon yo‘lig‘a yovuqroq yo‘l Yangi Yo‘l ko‘talidur.

Valiyon va Xinjong‘a inar.

Yana bir yo‘l Qipchoq ko‘talidur.

Andarob suyi bila Qizil Suning qotilishig‘a inar.

Bu yo‘l dag‘i yaxshi yo‘ldur.

Yana bir yo‘l Shibartu ko‘talidur.

Yozlar su ulg‘oysa Shibartu ko‘talidin oshib Bomiyon va Sayqon bila yururlar.

Qishlar [...] bo‘lur.

Qishlar to‘rt besh oy hech yo‘l- [o‘qilishi noaniq] lar bog‘loqdur, bir Shibartu yo‘lidin o‘zga.

Bu ko‘taldin oshib ot bila va piyoda yururlar.

Yozlar sular kirganda ham bu yo‘llarning qishqi hukmi bor, ne uchun kim takob yo‘l-lari su ulug‘ bo‘lg‘ondin o‘tub bo‘lmas.

Takob bila yurumay tog‘ bila yurur xayol qilsalar, ubur muta’azzirdur.

Kuzlar uch to‘rt oy kim qor kamdur va sular kichik, bu yo‘llarning uburi mahallidur.