✺Baburname

Barang‘or tarafidin bir ikki yigit Ko‘cha-i Bog‘ aro chiqqonlar bila bir ikki qilich solishib olishurlar.

Chun urushqa farmon yo‘q edi, ush muncha bila yondilar.

Qo‘rg‘on eli bisyor oldarodilar.

Muqim beglarni arog‘a solib, qulluqqa kelib, Kobulni topshurmoq bo‘ldi.

Boqiy Beg Chag‘oniyoniy-ning tavassuti bila kelib mulozamat qildi.

Biz dag‘i inoyat u shafqat maqomida bo‘lub, dag‘dag‘a-vu tavahhumni aning xotiridin raf’ qilduq.

Muqarrar bo‘ldi kim, tonglasi bo‘lg‘on navkar-u sudur va mol-u jihoti bila chiqib qo‘rg‘on-ni topshurg‘oy.

Xusrav Shohg‘a ta’alluq ellar besarliq va dastandozliqqa o‘rga-ngan ellar edi.

Muqimning ko‘chini chiqarmoqqa Jahongir Mirzoni va Nosir Mirzoni, ulug‘ beglarni, ichkilarni ta’yin qilduq kim, Muqimni va Muqimg‘a ta’alluq el-kunni mol-u jihotlari bila Kobuldin chiqorg‘oylar.

Muqimg‘a Yurt Tepani ta’yin qilduq.

Sabohi mirzolar-u beglar darvozalar-g‘a borib, xaloyiqning hujum-u g‘avg‘osi-ni ko‘p ko‘rub, manga kishi yibordilar kim: «Siz kelmaguncha bu elni kishi man’ qilib bo‘lmas».

Oxir o‘zum otlandim.

To‘rt besh kishini o‘qlab, bir ikki kishini pora-pora qildurdum.