✺Baburname

Chun bishkol yetishib edi va besh olti oy cherik cheriklab cherik elining ot va ulog‘i xarob bo‘lub edi, borg‘on ilg‘or sultonlar va beglarga farmon bo‘ldi kim Agra va ul navohidin toza zo‘r ilg‘or kelguncha yetkan yerda tavaqquf qilg‘oylar. Ushbu namozi digar Boqi Shiqovul bila Avad cherikiga ruxsat berildi. Muso-yi Ma’ruf Farmuliy kim cherikdin yonib Soru daryosidin o‘tkanda kelib mulozamat qilib edi, o‘ttuz laklik pargana Amruhordin vajhig‘a ta’yin qilib xossa bosh ayoq va egarlik ot inoyat qilib Amruhorg‘a ruxsat berildi. Bu taraflardin xotir jam’ qilib seshanba kechasi uch pos va bir garidin so‘ng ilg‘or tariqi bila Agrag‘a mutavajjih bo‘lduk. Tonglasi o‘n olti

kuro‘h yo‘l kelib tushka yovuq Kolpi tavobi’idin Bilovar degan parganada tushlanib otqa arpa berib namozi shom andin otlanildi. Bu kecha o‘n uch kuro‘h yo‘l yurub uch posda Kolpi parganalaridin Savgandpurg‘a Bahodur Xon Sarvoniyning go‘rxonasig‘a tushub uyuqlab namozi bomdodni o‘tab andin tebraduk.

O‘n olti kuro‘h kelib kun tushda Etovag‘a yettuk. Mahdiy Xoja o‘tru keldi.

Kechaning bir posidin andin otlanib yo‘lda ozroqcha uyuqlab o‘n olti kuro‘h yo‘l kelib Ropriy yettuk. Fathpurg‘a tush to‘ldi. Erta namozi peshin Fathpurdin otlanib o‘n yeti kuro‘h yo‘l yurub kechaning iki posida Agraning Hasht Bihisht bog‘ig‘a tushuldi. Tonglasi Odina kuni Muhammad Baxshi va ba’zilar kelib mulozamat qildilar. Namozi peshinga yovuq Javndin o‘tub Xoja Abdulhaq mulozamat qilib qal’a borib amma begimlarni ko‘rdum. Balxiy Polizkorni qovun ekkali qo‘yulub edi. Bir necha qovun soxlog‘on ekandur. Kelturdi. Xayli yaxshig‘ina qovunlar edi. Bir ikki buta tok Hasht Bihisht bog‘ida ekturub edim. Aning ham yaxshig‘ina uzumlari bo‘lub edi. Shayx Go‘ran