✺Baburname

Bularning o‘tkanini ko‘rub Bangolilar qalin yayoq bularg‘a mutavajjih bo‘ldilar.

Esan Temur Sultonning yeti sekiz navkari otlanib bu yayoqlarning utrusig‘a borib Sulton otlang‘uncha tortquloshib otquloshib yayoqlarni Sulton sorig‘a torttilar. Mungacha Esan Temur Sulton ham otlandi. Ikinchi kema ham kechti. O‘tuz o‘tuz besh otlig‘ bila qalin yayoqqa chopib yaxshi qochurdi. Xayli namoyon ish qildi. Avval just-u chaspon betahoshi borchadin burunroq kechti. Ikinchi ul kim qalin yayoq ustiga oz kishi bila yaxshi yurub qochurdi. To‘xta Buqo Sulton ham kechti. Kemalar paydar-pay kechmakka kirishtilar. Lohuriy va Hindustoniy yosunluq to‘shidin dastak bila va dasta qomish bila o‘ta kirishtilar.

Bu holatni ko‘rub mo‘ljor to‘g‘risidog‘i qalin Bangoliy kemalari su quyi qocha yuz qo‘ydilar. Darvesh Muhammad Sorbon va Do‘st Eshik Og‘o va yana ba’zi yigitlar mo‘ljor to‘g‘risidin o‘ttilar. Sultonlarg‘a kishi chopturdum kim o‘tkanlarni yaxshi yig‘ib ul utrudog‘i favjg‘a yovuq yeta yonidin yurub g‘animg‘a ilik qo‘shung. O‘tkanlarni sultonlar o‘zlarig‘a qo‘shub uch to‘rt to‘p bo‘lub g‘anim sori mutavajjih bo‘ldilar. Bular yovuq yeta g‘anim kishisi yayoqni olig‘a solib yosolini buzmay yuruydi. Askariy bila muqarrar bo‘lg‘on favjdin Ko‘ki jamoati bila yetar.