✺Baburname

shimoli tarafi kechib su yoqosida kemalarni turg‘uzduk. Yigitlar bir pora qildilar. Bir pora kushtigirlik qildilar. Soqi Muhsin da’vo qildi kim to‘rt besh kishini miyongirliq qilur men. Bir kishi bila tutti. Yiqila yozdi. Ikinchi Shodmon edi. Muhsinni yiqti. Xajil-u munfa’il bo‘ldi. Kushtigirlar ham kelib kushti tuttilar. Tonglasi shanba kuni Karamnos suyining guzarini ko‘rarga kishi yiborgan jihatdin bir pahar yovuq ko‘chuldi. Men otlanib guzar sori bir kuro‘hcha Karamnos suyi yo‘qqori bordim. Guzar yiroq jihatdin yana yonib kema bila oq yurtqa keldim. O‘rdu Chavsa din bir kuro‘h ilgarirak tushub edi. Ushbu kun yana murch dorusini

qildim. Bir nima isig‘roq ekandur. Vujudum qobordi. Xayli tashvish torttim.

Ilgari botqoqlig‘ kichikrak kina su bor ekandur. Yo‘lini yosomoq uchun tonglasi ul yurtta turuldi. Dushanba axshomi Abdulaziz yiborgan Hindustoni yoyoq kelturgan xatg‘a javob bitib yiborildi. Dushanba sabohi kema bila keldim. Yel jihatdin kemalarni tortib kelturdilar. O‘tkan yil qolin olturg‘on Baksara to‘g‘risidog‘i yurtning ro‘barusig‘a yetib sudin o‘tub ul yurtni sayr qili[l]di [?]. Daryo yoqosig‘a yetarga zinalar G‘olibo qirqdin ko‘prak ellikdin ozroq edi. Iki yo‘qqorig‘i zina qoliptur.