✺Baburname

Xoja Kalon G‘azniy chog‘irlaridin bir necha tevada yuklanib edi. Xoja Kalonning yurti bir balandida voqe’ bo‘lub edi kim qo‘rg‘ong‘a va o‘rdug‘a mushrif edi. Anda suhbate tutulub ba’zi el chog‘ir ichtilar, ba’zi el araq ichtilar. Tavr suhbate edi. Andin ko‘chub Milvatning bir arg‘adalliq ushoq tog‘laridin oshib Dung‘a kelduk.

Hinduston tili bila jalgani Dun der emishlar. Hindustonda bir oqar suv ushbu Dundadur. Dunning atrofi qalin kentlardur. Jasvol parganasi emish kim Dilovar Xon alarning [shiqqdori?] bo‘lg‘oy. Dun tavr jalgae tushubtur. Rudning atrofi o‘langdur. Ba’zi yerda ekibturlar. O‘rtasidin uch to‘rt tegirmon suv oqib boradur. Jalganing kengligi bir kuro‘h, ikki kuro‘h, ba’zi yer bo‘lg‘oy kim uch kuro‘h ham bo‘lg‘oy. Tog‘lari kichikrak-kichikrak past yosunluq tog‘lardur.