✺Baburname

Mullo Mahmuddin g‘ofil bu misra’ni o‘qudi kim: «Dar har ki bingari, ba-hamin dog‘ mubtalost».

Mullo Mahmud hushyor edi. Abdullohg‘a hazl-i sarih bila bu misra’ni o‘qug‘on jihatdin ta’rizlar qildi. Abdulloh voqif bo‘lub iztiroblar qilib xayli shirin guft-u gular qildi. Panjshanba kuni xazonlar sayri qilib kech namoz-i shom Chorbog‘qa kelib tushtum. Jum’a kuni oyning o‘n oltisida Bog‘-i Banafshada ma’jun yeb ba’zi maxsuslar bila kemaga kirildi. Humoyun bila Komron ham so‘ngra keldilar. Humoyun bir o‘rdakni yaxshi otti. Shanba kuni oyning o‘n sakkizida Chorbog‘din tun yarimida otlandim. Tunqotar va axtachini yondurdum.

Mullo Boboning ko‘prukidin o‘tub Divrin tangisi bila chiqib Qush Nodir va Bozorlarning korizi bila Xirsxonaning orqasidin evrulub erta sunnat vaqtida Turdi Beg Xoksorning korizig‘a keldim. Turdi Beg xabar topib iztirob bila yugurub chiqti.

Turdi Begning qalloshliqi ma’lum edi. O‘zum bila yuz shohruhiy olib borib edim. Turdi Begga berdim. Dedim kim: «Chog‘ir va asbob tayyor qilg‘il kim xilvat va lavandona suhbat tutar xayolim bor».

Turdi Beg chog‘ir uchun Bihzodiy sori bordi. Otimni Turdi Begning qulidin bir qulg‘a yibordim. O‘zum korizning orqasida bir pushtada olturdum. Bir pos bor edi kim Turdi Beg bir ko‘za chog‘ir kelturdi. Ikavdin ikav ichmakka mashg‘ul bo‘lduk.