✺Baburname

Panjshir suyining qotilishida jola tog‘ning to‘qunushig‘a urunub g‘arq bo‘la bordi.

Ruh Dam, Tengri Quli, Mir Muhammad Jolabon jola tog‘qa urung‘och sug‘a yiqildilar. Ruh Dam bila Tengri Quli-ni tashvishlar bila tortib jolag‘a-o‘q chiqordilar. Chini piyola va qoshuq va doyira sug‘a bordi. Mundin o‘tub Sang-i Barida to‘g‘risig‘a yetkanda jola suning orasida shoxqa mu yo band uchun qoqqon qozuqqa mu urundi? Shoh Hasan-i Shoh Beg orqong‘a-o‘q bordi. Mirzo Quli Ko‘kaltoshni ola-o‘q yiqildi. Darvish Muhammad Sorbon ham sug‘a yiqildi. Mirzo Quli tavri bordi: yiqilur mahalda eligidagi qovun kesadur pichoqni jolaning ustidagi bo‘ryog‘a sanchib-o‘q yiqildi. Mirzo Quli jolag‘a kelmay to‘n o‘frog‘i bila uzub chiqti. Joladin chiqib ul axshom jolabonlarning uyida qo‘nduq.

Bi’aynihi sug‘a borg‘on haft-rang piyola-dek piyola Darvish Muhammad peshkash qildi. Odina kuni su yoqa-sidin otlanildi. Inchkadin qo‘yig‘a Ko‘h-i Bacha-ning domanasida tushub o‘z eligimiz bila g‘alaba misvok olduq. Andin o‘tub Xoja Xizrlarning uyida osh yeb otlanildi. Namoz-i peshin Qutluq Xojaning tuyuli Lamg‘on kentiga tushtuk. Qutluq Xoja hozirini hozir qildi. Tanovul qilib otlanib Kobulg‘a kelildi. Dushanba kuni oyining yigirma beshida Darvish Muhammad Sorbong‘a xossa xil’at va egarlik ot inoyat qilib navkarlikka yukunduruldi. To‘rt besh oy sochimni qirqmaydur edim. Chahorshanba kuni oyining yigirma yetisida sochim-ni qirqittim. Bu kun chog‘ir suhbati bo‘ldi. Odina kuni oyining yigirma to‘qquzida Mir Xurd-ni Hindol atokaligiga yukunduruldi. Ming shohruhiy sochiq kivurdi. Chahorshanba kuni Ramazon