✺Baburname

tasarrufidin chiqti. Hindustondag‘i viloyatlar bularning tasarrufida edi. Tarix to‘qquz yuz o‘nda Kobulg‘a avval kelgan yili kim Hindustong‘a kirmak do’iyasi bila Xaybardin o‘tub Parshovar kelganda Boqiy Chag‘oniyoniyning sa’yi bila qo‘yig‘i Bangash sori kim Ko‘hat bo‘lg‘oy yurub qalin Afg‘onistonni chopib qirib Bannu va Dashtni tolop toroj qilib Duki bila chiqildi. Ul fursat Bihra va Xushob va Chanob hukumati Mir Alining nabirasi G‘oziy Xonning o‘g‘li Sayyid Ali Xong‘a ta’alluq edi. Iskandar Bahlulning otig‘a xutba o‘qub aning ito’atida edi. Ul cherik cheriklagandin mutavahhim bo‘lub Bihrani toshlab Bahat suyidin o‘tub Bihra kentlaridin Shirkutni

olturur yer yosop edi. Bir ikki yildin so‘ng bizning jihatimizdin Sayyid Ali Xon bila afg‘on badgumon bo‘ldi. Ul ham bu sababdin dag‘dag‘a va tavahhum o‘ziga yo‘l berib bu viloyatlarni Davlat Xon Totor Xon Yusuf Xaylg‘a kim Lohur hokimi ul vaqt ul edi, topshurdi. Davlat Xon ulug‘ o‘g‘li Ali Xong‘a Bihrani berib edi. Ul chog‘ Bihra Ali Xonning tasarrufida edi. Davlat Xonning otasi Totor Xon ul olti yetti sardorning birisidur kim xuruj qilib Hindustong‘a mutasarrif bo‘lub Bahlulni podshoh qildilar.