✺Baburname

derlar, kark ovlog‘ali bordim. Bir necha kark paydo bo‘ldi, vali jangali qalin edi. Jangaldin chiqmadi. Bir buzovluq kark tuzga chiqib qocha berdi. Xeyli o‘q uruldi edi.

O‘zini jangalg‘a soldi. Jangalg‘a o‘t soldilar. Ul kark xud topilmadi.

Yana bir kark buzovi o‘tqa kuyub teprechilab [?] yotadur, bo‘g‘uzlab har kishi shiralg‘a oldi. Savotidin yonib xeyli sargardonliq tortib namoz-i xuftan o‘rdug‘a keldik. Guzar ko‘ra borg‘onlar guzar ko‘rub kelibturlar. Tonglasi panjshanba kuni oyning o‘n oltisida ot-u teva bila va partol bila kechittin kechildi. O‘rdu bozori va yayog‘ va eshak-ni jolabonlar jola bila kechurdilar. Ushbu kun guzar boshida ekanda Nilobiylar kelib bir kechim-lig ot va uch yuz shohruhiy peshkash qilib ko‘rdilar. El tamom kechkach ushal namoz-i peshin oq ko‘chub kechaning bir posig‘acha yurub kecha Kechako‘t suyining yovug‘ig‘a tushuldi.

Andin erta ko‘chub Kechako‘t suyini o‘tub tush qatila Sangdoki ko‘talini oshib tushuldi. Sayyid Qosim Eshik Og‘o chag‘dovul edi. Keyindin o‘rdu keyincha keladurgan Gujurlarni tutub bir necha bosh kesib kelturdi. Sangdokidin sahar ko‘chub kech namoz-i peshin Suhon suyini o‘tub tushuldi. O‘rduning keyini tun yorimig‘acha kela qoldi.