✺Baburname

bir dast bizning irovulumizni urub yondurub g‘o‘lg‘a tiqtilar. O‘q qo‘yub kim yuruduk, andoq fursat o‘q qo‘yub to‘xtag‘on dek qildilar. Utrumda bir kishi elni chaqirib ottin tushub o‘q qo‘yar xayol qildi. Biz be-tavaqquf yurub kelganimiz bila bo‘ldura olmadi. Atlanib yuruy berdi. Bu yayoq tushgan Shoh Beg o‘zi egandur. Urush asnosida Piriy Beg to‘rt besh og‘a-inisi bila dastor-larin olib yog‘idin yuz evurub bizga kirdilar. Bu Piriy Beg Turkman ul turkmanlardindur kim Shoh Ismoil Boyundur saloting‘a musallat bo‘lub Iroq mamolikiga mutasarrif bo‘lg‘onda Abdulboqiy Mirzo va Murod Beg Boyundur boshliq turkman beglari bila kelib edilar. Barang‘orimiz yog‘ini

burunroq olib tebradi. Barang‘orimizning uchi men yosog‘on bog‘qa sanchilib bordi.

Javong‘orimiz Bobo Hasan Abdoldin xayli quyiroq ulug‘ axmil ariqlarg‘a tegilib bordi. Bizning javong‘orimizning utrusida Muqim edi. Tavobi’-u lavohiqi bila javong‘or kishisi g‘animi Muqimg‘a boqa asru oz edi. Tengri rost kelturdi, Qandahorg‘a va kentlarig‘a borur uch to‘rt ulug‘ axmil ariqlar bizning javong‘or bila g‘anim orosida voqi’ bo‘ldi. Guzar boshini tutub o‘tkali qo‘ymadilar. Javong‘or kishisi bovujud-i ozliq yaxshilar to‘xtab ayoq berkitti. Arg‘unlar tarafidin Halvochi Tarxon su ichida Qanbar Ali va Tengriberdi bila chopqulashtilar.