✺Baburname

Mavlono Abdurrahmon Jomiy edi. Yana Shayxim Suhayliy va Hasan Ali Tufayliy Jaloyir edi kim otlari va sifatlari Sulton Husayn Mirzoning beglari va ichkilari jargasida mazkur-u mastur bo‘ldi. Yana Osafiy edi. Vazirzoda uchun Osafiy taxallus qilibtur. She’ri rang-u mazmundin xoli emastur, agarchi ishq-u holdin be-bahradur. O‘zining da’vosi bu edi kim: «Men hargiz hech g‘azalimni yig‘ishturmoq vodisida bo‘lmadim». G‘olibo takalluf bo‘lg‘oy. Bu g‘azaliyotni inisi yo qarobati jam’ qilibtur. G‘azaldin o‘zga nav’ she’r kam aytib-tur. Men Xuroson borg‘onda mulozamat qilib edi. Yana Banoiy edi. Hiriylig‘dur. Otasi Ustod Muhammad sarbanno uchun mundoq taxallus qilibtur. G‘azalida rang-u hol bordur.

Devon tartib qilibtur. Masnaviylari ham bor. Bir masnaviysi bor, mevalar bobida, mutaqorib bahrida. Be-muhassal nima debtur, bekori qilibtur. Yana bir muxtasar masnaviysi bor, xafif bahrida.

Yana bir ulug‘roq masnaviysi bor, ul ham xafif bahrida. Bu masnaviyni so‘ngralar tu-katib edi. Burunlar musiqiydin bexabar ekandur. Bu jihattin Ali Sher Beg ta’n qilur ekandur. Bir yil Mirzo Marvg‘a qishlay borg‘onda Ali Sher Beg ham borur. Banoiy Hiriyda qolur.

Ul qish musiqiy mashq qilur. Yozg‘acha ancha bo‘lur kim ishlar bog‘lar. Yoz Mirzo Hiriyga kelganda savt-u naqsh o‘tkarur. Ali Sher Beg taajjub qilib tahsin qilur. Musiqiyda tavr ishlar bog‘labtur. Ul jumladin bir naqshi bor, Nuh Rang‘g‘a mavsum. To‘qquz rangning tukanishi va naqshning yallasi Rosttadur. Ali Sher Begga xayli muoriz ekandur. Bu jihattin xayli jafolar tortti. Oxir tura olmay Iroq va Ozarboyjong‘a Ya’qub Beg qoshida bordi.