✺Baburname

Bir Muhammad Burunduq Barlos edi. Choku Barlos naslidindur: Muhammad Burunduq ibn Ali ibn Burunduq ibn Jahon Shoh ibn Choku Barlos. Bobur Mirzo qoshida beg edi. Andin so‘ng Sulton Abu Sa’id Mirzo ham anga ri’oyat qilib, Jahongir Barlos bila Kobulni berib, Ulug‘ Beg Mirzog‘a ataka qilib edi. Sulton Abu Sa’id Mirzodin so‘ng Ulug‘ Beg Mirzo Barloslarg‘a qasd qilur maqomda bo‘ldi. Bular tuyub Mirzoni tutub, el-u ulusini ko‘churub Qunduz sori ko‘chtilar. Hindukushning ustidin Mirzoni odamiyona Kobul sori uzatib, o‘zlari Xurosong‘a Sulton Husayn Mirzog‘a bordilar. Mirzo ham yaxshi ri’oyatlarin qildi. Muhammad Burunduq asru bilimlig kishi edi. Bisyor sardor kishi edi. Qushqa asru ko‘p mayli bor edi, andoq kim bir qushi o‘lsa yo yitsa, o‘g‘lonlarining otini tutub aytur

ekandur kim: «Bu qush o‘lguncha yo yitguncha faloni o‘lsa ne edi?» Yo: «Falonining bo‘yni sinsa ne edi?»

Yana Muzaffar Barlos edi. Mirzoning qazoqliqlarida bor edi. Bilmen Mirzog‘a qaysi tavri xush yoqib asru ulug‘ ri’oyat qilib edi. E’tibori bu martabada edi kim Sulton Husayn Mirzo qazoqlig‘ida aning bila mundoq shart qilib edi: har viloyat kim musaxxar bo‘lsa, chahor dong Mirzoning bo‘lg‘oy, du dong aning. Bu ajab shartdur. Podshohliqta qachon rost kelgay kim bir qarochu kishini o‘zi bila sharik qilg‘oy? Ini-o‘g‘ul bila mundoq shart muyassar bo‘lmas, beg kishi bila xud nechuk muyassar bo‘lur? Taxt olg‘ondin so‘ng bu sharttin pushaymon bo‘ldi, vale sud qilmadi.