✺Baburname

Sahar vaqti O‘sh qo‘rg‘onig‘a g‘ofilliqta yetishtuk. O‘sh eli chora qila olmadilar. O‘shni topshurdilar. Bi’t-tab’ viloyat eli bizni ko‘p tilar erdilar. Tanbalning qo‘rqunchidin va bizning yiroqliqimizdin choralarin topa olmaslar edi. O‘shqa kelib kirgach Andijonning sharq-u janubidag‘i tog‘-u tuz el-u uluslari tamom kirdilar.

O‘zkandning, kim burun Farg‘onaning poytaxti ul ekandur, yaxshi qo‘rg‘oni bor. Sarhadda voqi’ bo‘lubtur. Eli bizning qulluqimizni qabul qilib kishi yiborib manga kirdilar. Necha kundin so‘ng Marg‘inonlig‘ ham dorug‘asini urub qavlab manga kirdilar. Xujand suyining Andijon tarafidag‘i qo‘rg‘onlardin bir Andijon-din o‘zga tamom kirdilar. Bu ayyomda, bovujud kim mundoq sho‘r-u fitna qoyim bo‘ldi, Tanbal hanuz o‘ziga kelturmay, Axsi bila Karnon aroliqida otlig‘ yayaq cheriki bila Xonlar bila ro‘baro‘ bo‘lub o‘zini shox-u xandaq bila berkitib o‘lturub edi.

Bir necha navbat ul tarafdin ozog‘loq urush-murush bo‘lur, vali hech jonibtin g‘olibiyyat-u mag‘lubiyyat mushaxxas-u ma’lum bo‘lmas. Chun Andijon tarafidag‘i el-u ulus va qo‘rg‘on-u viloyat aksar manga kirdilar. Andijonning eli ham bi’t-tab’ meni tilar edilar, vali choralarin topa olmaslar edi. Xotirg‘a yetti kim bir kecha Andijonning yavuqi-g‘a borib kishi kivurub xoja-u arboblari bila so‘zlashsak, ehtimoli bor kim bizni bir tarafdin kivurgaylar. Bu xayol bila O‘shdin otlanib yarim kecha Andijonning bir kuro‘hi-da Childuxtaron ro‘baro‘yig‘a kelduk. Qambar Ali Beg va yana ba’zi beglarni ilgarirak yiborildi kim inchkalik bila qo‘rg‘ong‘a kishi kivurub xoja-u arbob bila so‘zlashgaylar. Biz bu bor-g‘on beglarning intizorida ot ustida-o‘q turub eduk, ba’zi urgudamakta,